玩咗8年沙龍會s36， 主角機當然永遠都係設計得最有型最受歡迎， 但另有一批Fans會對線條獨獨特嘅渣古情有獨鍾。 最後淨低嘅， 就係雜魚中嘅雜魚——吉姆。 不過今次最新嘅《高達創戰者 GM的逆襲》動畫就連個名都似乎想為吉姆（GM）平反， 再睇翻呢隻咁型棍嘅HG 1/144 GM/GM模型， 係咪想叫大家以後唔好睇少吉姆呀？
《高達創戰者 GM的逆襲》故事究竟講乜？係咪真係要為吉姆平反？現階段真係未知。 不過啱啱公佈嘅呢款HGBF 1/144 GM/GM模型就真係令唔少人對「吉姆」另眼相看。 比起以往「笨手笨腳」嘅吉姆造型， 呢隻GM/GM不論整體身形比例同線條設計都明顯有型得多， 如果改過個名喺第二套卡通出現， 可能大家都會直接覺得佢係主角。 事實上， 呢款模型唔單只外型夠靚， 成隻吉姆嘅可動程度亦非常之高， 簡約嘅設計拎佢唔會好似好多累贅嘅機體咁咁多嘢頂住， 要擺咩有型姿勢都全無難度。